أكثر اللحظات التي تأثرت بها اليمنيات في الأعراس (1)

أكثر اللحظات التي تأثرت بها اليمنيات في الأعراس (1)

مقالات الكاتب :أميرة السماوي

2018-02-26

بعد ان جمعنا لكم في مقال سابق أكثر اللحظات التي تأثرت بها نخبة من المصورات اليمنيات، سنستعرض لكم في هذا المقال مجموعة من المواقف التي شاركتنا بها مجموعة من المشاركات غير المصورات لأن المواقف كثيرة فسنستعرضها في أكثر من مقال

 

 

1- "بكيت بالعراس عندما ينزلوا العرسان فيها يبوسوا رجول أمهاتهم وهذا شيء يرفع قدرهم جداً"
 

2- "بكيت بعرس وحده اخوها كان متأثر جداً من فكرة زواجها وسفرها لدرجة انه سرق رقمي عشان يقول انه حابب يفاجئها بأي حاجة ورتبنا لدخوله ورقصه معاها وجاب معاه بوكيه ورد ودخلناه زي السرق عشان تفاجئ، فكانت رده فعلها والاحضان والبكاء والمشاعر كانت حاجة ثانية وفعلا تشعري انك تتطمني بوجود اخوان مثله"
 

3- "بكيت بعرس لما ابو العروسة دخل بالبروفه وعشان مانشوفه يبكي راح يشتري مي وبكيت لما دخلها بيوم العرس وهو حافظ الكلمات يرددها كبرت البنوت كبرت ست الكل ويحظن زوجها بقوه كانه يأمنه عليها وبكيت من ردة فعل زوجها والاحترام الي ابداه للحظة كأنه يقول له انه فهم التوصية"
 

 

4- "اكثر شيء وجعني انه عرس اختي الوحيدة ماحضرته وعرس أخي الصغير وآخر واحد ماحضرت ولما كنت اكلم اختي كانت تخنقني العبرة وابعد التلفون واتنفس وارجع اكلمه كأني فرحانة واني ابكي، وأخي ما قدرت الا ابعث تسجيل له وعدت التسجيل أكثر من مرة عشان أقدر أوقف البكاء، الله يسعد كل العرائس، وقبل عرس اخي كنت اسمع اغنية مبروك لك ياامها اقوله افتحها لام العروسة وجلست أبكي ما فهمت هي بنتي ولا هو أخي أو ابني شعور غريب"
 

5- "بكل عرس لازم وربي ادمممع وتجيلي خنننقه ودموووع بس ما ابين لأحد بالذات لما اشوف الأم تبكي والأب والأخوان واقول الأم هم بيروحوا البيت وهي مهليش وهي مش معاهم وكيف بتنام بعيده عن أمه واتخيل نفسي وأدمع وربي حتى تجيلي خنقه وكأنه اقرب للعروسة"
 

6- "طبيعي بأي زواج وتجي غنية كذا حزينة دموعي ماتوقف، بزواج جيراني أخو العروسة مغترب وبدون ما هي تعرف طلب منهم يحطوا فيديو له بغربته على الأغنية أختي حبيبتي، العروسة كانت تبكي من شق وأني من شق من كثر ما حسيت كيف الفراق صعب "
 

7- "اني ابكي بكل عرس، أب يدخل بنته لأن أبي متوفي"
 

 

8- "اني لمن اروح عرس واشوف العروسة معاها خوات تتسند فيهم ويفرحولها أفكر اني بلاخوات وبيجيلي بكى

ولمن أذكر أن صديقتي بتتزوج بتروح دي الأيام ومبتكونش معي واني عروسة ابكي"
 

9- " قريت منشور عن وحدة بنت مشلولة حبها واحد واهله رافضين يتزوجها لكنه هو متمسك فيها وكانت البنت ماتشتي زفاف وكان يقلها انتي ماتفرقي عنهم، بعملك اروع زفاف، تقله كيف بدخل واني ماقدر امشي لما يوم الزفاف كانت لابسة الثوب الأبيض ودخل القاعة وهو حاملها والناس شافوا المنظر دا اتأثروا وبكوا "
 

10- " انا في عرسي ...لما دخل ابي واخوتي يسلموا عليا اول ما ابسرت ابي ما استحملتش نزلت واستقبلته في نص الممر ووطيت اسلم عليه وهوو مكبود وانا حاضن له وجالسة ابكي ماشفت الا لما جابوا له المكرفون وبدء يزفني وصوته هاذك كله حنان ومغصوص ... وبدء ياحجار الدار حني شمعة الدار خارجه وهو كان نشاد وانا كمان طلعت عليه نشادة

واخذت المكرفون وزفيته يحفظك يابه عليا ياضياء عيني انا  .... وزفيت امي واخوتي ...ورجع اخي الكبير زفني ...

عمري ماشنسى صوته متغلغل وسط قلبي كنت احبه واموت فيه ومتعلقه به لحد الجنون ...تزوجت واغتربت عنه سنتين وفي يوم وليله تسهلت سفرتي وشفته بس ماشبعت منه ورجع سافرت جلست بس شهرين وجاء لي خبر موته اااااااخ ياقلبي بس.... الله يكرمه بالفردوس الأعلى مثل ما أكرمني بالدنيا .. "

 

11- " أكثر شي مُأثر فيني ولليوم هو يوم عرسي دخلو الرجال وأبي وجهه مكبود وعيونه ملان دموع وجالس يشتت عيونه دخلوا حضنتهم وبكيت وهم حبوني وجو جمبي عشان نتصور كان كل الرجال موجودين الا اخي هو اصغر مني بس احنا اصحاب قوي كان خارج الصاله بيبكي  بعد ما اتصورت مع الكل دخل وعيونه ملان دموع وماسك فمه عشان لايبكي وجالس يكابر ( الصوره هذه موثقه كان اهلي كلهم مبتسمين الا أخي وأبي كل واحد عيونه في جهه ومكابرين قوي ) كل ما ابسر الصورة أدمع لا إرادي"
 

12- "يوم عرسي كان بعد موت صديقتي الروح بالروح بشهرين فكنت نازلة من الممر وسمعت الأغنية تبع الزفة اللي اختارتها لي أيام ماكنا نجهز لعرسي انا وياها فحسسييت هذك اللحظة مش قادرة اتحكم بدموعي وحزني عليها ولو كان عليا كنت قرحت بكئ لولا أن الكل كان يقل لي حاولي تتماسكي وكانت تنزل الدموع لا إرادياً ، الله يرحمها فعلا موقف صعب الله لايحط احد بمثل هذا الموقف وربي يرحم كل غالي "


 

13- "اول مابدأت زفتي دخلت الممر شفت امي وعلى طول بكيت كانو يهدوني من بعيد وانا أبسر أمي وأبكي هذا وانا كنت مجهزه نفسي اكون قوية وما ابكيش عشان امي با تبكي أكثر من ، ولما كنت جالسه في الكوشه أخي أهداني اغنيه صدق خلتني انهار كانت كلماتها مأثره قوي وجلست أبكي والكل يغطي عليا ويهديني يومها بكت ناس خيرات في عرسي"
 

14- " في عرس واحدة من اقاربنا، كان زواجها عن حب .. أول ما دخل العريس الصالة وشافها بالفستان الابيض دمعت عيونه من الفرحة كلناااا اتأثرنا ودمعنا معه"
 

15- "اصعب موقف في العرس لما دخلت الصاله وكانت امى على يمينى في مدخل الصالة وقالت لى يالله اطلعي بدأت الزفة وبدأت أمشي ومبسوطة وطلعت الممر فجاء دور أمي وما لقيتها التفت للخلف الاقيها واقفه وكل ما مشيت خطوة على الممر تبعد منه وقفت وجلست ابكي واقول لهم خلو أمي تجي حسيت وقته بس اني دخلت حياة ثاني بتكون هي بعيدة عن أمي واني بتحمل مسؤولية كبيرة واني لازم اعمل كل شي تعلمته من امي الله يحفظها ويطول عمرها يا رررب"
 

16- "لما دخل اخى الله يرحمه وحضنى لأول مرة احس بحضنه ودموعه ويقول لى ربي يسعدك وعيونه شروغت بدموع وحمرت أما اخي الصغير مارضي يدخل كان حانق ليش بتزوج هههه"
 

17- "الموقف الي عمري مابنساه لما أبي واهلي وصلوني لبيت زوجي ومشيوا حسيت روحي تخرج مني وحسيت انه اشتيهم كلهم يجلسوا معي.... شعور لايوصف بذات وأبي يأمن زوجي عليا ودموعه في عيونه ...كان اخس شعور وهم يمشوا ويودعوني بهذاك الوقت حسيت أن اهلي تخلوا عني مع انه الزواج بموافقتي وكل شي بسسس شعور عجيب مابتحس فيه الا الي وقعت بنفس الموقف.... هذا كان آخر شيء...قبلها أول ما شفت أبي دخلوا يسلموا عليا خلاص انهرت من البكاء مع انه كنت أقل ليش ببكي أني بسكن جنبهم وبنفس المدينة... الخرجه من عند الام والاب جداًاًاً صعبة....وكمان في لقطة لما ابي سلموني للعريس وبدأت زفتنا لفت لورايا أشوف إن ابي موجود وهو خلاص مشي حسيت ذاك الوقت بوجع ...مسرع فلتني..."
 

18- " بعرسي كان لي من ابي سته اشهر ما شفته ولا كلمته خاالص بعدين دخل عليا يوم الزفة عشان ياخذني لزوجي ودخلوا هو واعمامي واخواني الصغار أول ما شفتهم من الباب بكيييت وكانت على دخلتهم فتحت اغنية هلا بريحة هلي بس وصل لعندي وحضنته وابكككي واني متعودة من لما كنت صغيرة لو فيبي اي شي اكتم البكا لما اوصل لعند ابي الله يحفظه وانفجر ابكي وكذا عملت بعرسي جلست مكتومة لحد ما ظهر وانفجرت والقاعة كلللها كانت تبكي معي الآن كل ما اشوف فيديو عرسي لازم كلنا نبكي "
 

19- " بالبداية لما دخلت وكنت اشوف امي واختي واهلي وكنت ابكي بحرقه وماسكه دموعي بالغصب ولما دخل ابي حضنته وبكيت قلي لاتخافي انا باكون جمبك مابسيبك كل ما تحتاجي لي بتلقينا جمبك، وأول ما دخلوا اخواني الاثنين كانت الدموع بعيونهم كنت ابكي وهم يقولوا لا تخزي بنا جمب الناس تخلينا نبكي الاثنين وبعدها جاء ابن اختي الكبيرة حضني وبكاء ومرضى يفكني غير بالغصب لدرجة ان كل الموجودين بكو من بكانا"
 

20-

"اني كنت اتمنا اني ما تزوجت ولاحد يتقدم لي إلا وابي موجود عشان اسمه يكون بالعقد لأن العروسة من غير أب مثل اليتيمة بس الآن لو حد تقدم لي أبي سبقني و فلتني وراح الله يرحمه ويسكنه الجنه مافي أحد راح يكون زعلان عليك وقت زواجك مثل الأب والأم، والأب موقفه أصعب من الأم الله يرحمه ويصبرني على فراقه الله يرحمه"

 

 

 


نصائح عامة

مقالات ذات صلة